ՀՀՏԴ-ում մեծ աշխատանք է կատարվում տուբերկուլոզն այլ հիվանդություններից տարբերակելու գործում, որին  էապես  նպաստում են  օժանդակ հետազոտության ժամանակակից սարքերը (ռենտգենյան,  սոնոգրաֆիկ և էնդոսկոպիկ), տարբեր կաբինետների, լաբորատորիաների  առկայությունը:

Էնդոսկոպիկ  կաբինետում «Օլիմպուս»  ֆիբրոբրոնխոսկոպով տարեկան կատարվում է  շուրջ  400 հիվանդի բրոնխազննում, որը  հնարավորություն է  ընձեռում ախտորոշելու շնչառական համակարգի զանազան հիվանդություններ: Գործում է նաև ֆիզիաթերապևտիկ,   ցողացրման   կաբինետներ` անհրաժեշտ սարքավորումներով:
Տուբերկուլոզով  հիվանդները  բուժվում են  DOTS  ծրագրով (Directly observed  treatment  short-course , անմիջական  հսկողությամբ կարճատև  քիմիաթերապիա):   Այն տևում  է  6-8  ամիս  և  ներառում  է  4-5  հակատուբերկուլոզային հիմնական  պատրաստուկներ:

Նոր հայտնաբերված և թոքային քրոնիկական տուբերկուլոզով հիվանդները ստանում են բուժում համապատասխան  բաժանմունքներում մինչև  խորխի մանրէազերծումը:

Հոգեկան հիվանդություններով ուղեկցվող  տուբերկուլոզով  հիվանդների համար հատկացված է առանձին բաժանմունք:

2006 թ. բացվել է դեղորայքակայուն բաժանմունք, որը 2009 թ. վերանորոգվել է «ՁԻԱՀ-ի  և տուբերկուլոզի,  Մալարիայի  դեմ պայքարի գլոբալ ֆոնդի» ֆինանսական աջակցությամբ: 90  մահճակալանոց այս  բաժանմունքում բուժվում են այն անձինք, որոնք  արտազատում  են  հակատուբերկուլոզային հիմնական դեղամիջոների հանդեպ կայուն  հարուցիչներ:  Նման  հիվանդները  բուժվում են DOTS plus ծրագրի շրջանակներում, որը  ֆինանսավորվում  է  միջազգային կազմակերպությունների կողմից:  Բուժման տևողությունը  այս դեպքում  18-24  ամիս  է:  Առայժմ այս  ծրագիրը  պիլոտային   փուլում է:

Կրծքային վիրաբուժության  բաժանմունքը,  վերանորոգումից հետո,  կհամալրվի  նորագույն սարքավորումներով. բաժանմունքի  խորհրդատուն  է ԱՆ գլխավոր թոքային վիրաբույժ  բ.գ.թ.  Հ.Սարկավագյանը: 2008թ. բաժանմունքում բուժվել է 338 հիվանդ:  Բաժանմունքին կից  շուրջօրյա  գործում է վերակենդանացման ստորաբաժանում:

Գործում  է  նաև  վերակենդանացման  բաժանմունքը:  Այդտեղ իրականացվում  են ինչպես ինտենսիվ  բուժական  միջոցառումներ թոքային  և  արտաթոքային տեղակայում  ունեցող  տուբերկուլոզի բարդությունների դեպքում,   այնպես ել հետվիրահատական խնամք:

Ուրոլոգիական բաժանմունքում  կատարվում են այդ բնագավառի արդի պահանջներին բավարարող  վիրահատություններ` միզասեռական օրգանների  տուբերկուլոզի  ախտորոշման և բուժման նպատակով  (երիկամի, խոռոչային գոյացությունների , ադենոմաների, ամորձիների հեռացում, ցիստոպլաստիկա, միզապարկի TUR-բիոպսիա, ցիստոլիթոտրիպսիա և այլն): Բաժանմունքի խորհրդատուն է   բ.գ.դ, պրոֆեսոր  Ա.Ա. Ծատուրյանը:

Ոսկրահոդային  համակարգի,  մեջընդերքի  և ծայրամասային ավշահանգույցների տուբերկուլոզով տառապող հիվանդները  մասնագիտական բացառիկ  և որակյալ բուժում ստանալու հնարավորություն ունեն, ինչպես օրինակ ողերի վերականգնումն է աուտոտրանսպլանտատով:

ՀՀՏԴ-ում  հիվանդները  ստանում  են  նաև  հոգեբանական օժանդակություն:

Մանկական  բաժանմունքում բուժվում են տուբերկուլոզի բոլոր  ձևերով, այդ  թվում մենինգիտով  տառապող երեխաները ողջ  հանրապետությունից:  Բաժանմունքում գօրծում   է  8  ամյա միջնակարգ  դպրոց `  ք. Աբովյանի դպրոցներից  մեկի  մասնաճյուղ այն երեխաների  համար,  որոնք  ստանում են  երկարատև  բուժում ստացիոնարում: